ԿՈՐԵԼ Է

Ծանուցումներով հեղեղված լրագրեր ու
շենքեր շաղակրատ-
շարժանկարի պես հա՜ թրթռում են օրվա պատերին.-

կորել է
ազատության մեկնած համայնքը
հակառակության երկար բավիղներում,

կորել է
գողտրիկ երկիրը գերտերերի ու ազգ. ջոջերի
պոկերներում ու առուփախում,

կորել է
քաղաքը տրտմության ծանր մառախուղի մեջ,

կորել է
ընդոծիների անարատ ժպիտը
հաշտարարների գոլ դիմախաղերում,

կորել է
աստղը հավատի՝ ատելության ու քամահրանքի
անծայր սարահարթում,

կորել է
անեղծ ասացողը ամբոխավարների քրքիջի տակ,

կորել է
տարեցների համբերությունը
նորելուկների երթուդարձում,

կորել է
Տեսանողի նոթատետրը կինոկաճառի հանդիսասրահում,

կորել է
լայնածիր հոգին
հրավառության մեջ փոքրոգության,

կորել է
Անկեղծության տաճարի կլոր կնիքը,

կորել է
Ա. Հովհաննեսի սիրո վկայականը,

կորել է
գարնան լուսանկարը
սառչող երազների դողէրոցքում,

կորել է
ապագայի արծաթե բանալին
ներկայի նկուղներում,

կորել է
ոստաններիս զվարթությունը՝
պատմության շուրջօրյա խաղատներից,

կորել է
Հայրենիքիս անձնագիրը
անգետ ատյաններում միջազգային,

կորել է
արդարության մանրակերտը Համերաշխության թանգարանից,

կորել է
բանաստեղծություն մեծարողների խայտուն թափորը
ստահոդության ամեհի հորձանքում ...